المقدمة
السلام عليكم يا شباب , انا فهد طعبا اسم ما صفة , الصفة هي اني واحد عاطل بشهادة ذي أي واحد فيكم هههه سوداني وخليك سوداني وذي نصكم كمان ما عندي اي هدف بقولو عليه في الحياة , ابوي مسكين ومعاشو ما بكفيه.. على كل حال عايشين الفطور عصيدة والغداء غيرو الملاح والعشاء صلاة , طبعا اسمي فهد دا يمكن اسم غريب شوية في السودان بس أبوي قال لي اتولدت في السعودية والله للآن ما مصدق , يلا أديكم لمحة عن عائلتي قبل ما تبدا القصة :
أولا أبوي .. اسمو عبدالعزيز طبعا هو اتولد في السودان بس ابوه يعني جدي كان مغترب في السعودية ههه الحقيقة سموه عبد العزبز تيمنا بعمه (او جدي التاني كان طيب والله ) ,, طبعا ابوي كم ستين سنة ونازل معاش وشغلو الوحيد هو يقومنا صلاة الصبح ربنا يخليه لينا ..
ثانيا أمي .. معلوماتها طبعا محفوظة الحقوق ما نقدر ننشرها الا بأذن الحاج
واخواني اثنين أنا أكبرهم والبعدي خديجة وعرسوها وتاني اصغر واحد فينا محمد وهو لسه في الاساس ما صغير بس عاد كتير
بالنسبة لي بيتنا بيت كبير وواسع بنيناه زمن كنا في السعودية والظاهر كمل فيهو رزقنا طبعا هو في أم درمان الحي ما مهم
كدا عرفتو تقريبا اي حاجة عني و نسيت اهم شي عمري عشرين للآمانة خمسة وعشرين
..
- سعود يا سعود قوم ياخ الساعة 11
- مالك يا محمد ابوي يصحينا خمسة صباحا ويقطع احلامنا .. وانت توقفا لينا بالمرة
- هوي يا زول العصيدة دي بتبرد والله ما حصلت تاني إلا تاكل ليك طعمية
- خلاص جايكم .. اقوم اسوك بس
..
- ابوي , سعود قال جاي ارجوه
عبد العزيز : الود دا اسمهو فهد واكسل من النملة
- تقول شنو يا أبو فهد الفي عمره جابو عوابر (العوبر صغير الفهد و قيل ليس بصغير الفهد لكن هذا لايهم)
- انت همك العيال بس , العيال ديل بجو ساي كدا يعني
محمد : احم احم فهد جي
- اقعد يا ود أمي أكل وقوم شوف شغل عليك الله
عبد العزيز : والله أم التدلع فيك ياخ شد حيلك ما تقعد عاطل هديت اقتصاد البيت !
- والله أمي و أبوي كست جنس كوس بس الله ....
عبد العزيز : اسمع يا ولد كلام امك وما ترجع الليلة ذي اي يوم كفاية عاوزني اقوم انا اشتغل !
- العفو يا أبوي ... خالص دي قومتي بس أكل
..
- اعمل شنو يا ربي اكتب في وشي .. داير شغل.. اااه بس احسن امشي لي أصدقاء السوء ديل
- سعود يا فهدنا وين انت يا دفعة الكشتية مولعة في بيت عثمان ارح سريع ( احد اصدقاء فهد)
- ابرد ابرد انتو ما بتملو من الكشتينة دي .. انا ما جايكم عندي مشوار
- بياااااع
- اي اي بياع
..
فهد في نفسه : شغل كهربة في سودان الإنقاذ دا إلا دوير بوابير يارب انجدني وارزقني من حيث لا احتسب
بعد ساعات من البحث المتكرر عاد فهد للمنزل قرابة صلاة العصر :
ما خليت شركة صناعية او تصميمة او تركبية او الخ كلهم قالو انا علامي والله يا أبوي ما لقيت شغل
- يا فهد ما عرفاك تشتغل متين , جننتني !
- ابوي الله بس والصبر
- ابوك دا كبر بس والله كدي امشي صلي العصر وتعال للغداء لانو ناس اختك ديل جو من السفر
- عديلة يما
- ولدك كسلان يا ابوفهد لكن بسمع الكلام
- والله لو ما بسمع وبشتغل اخير ليه
..
- يا سعود والله انت عاطل وما عندك همة بالمرة
- محمد الله كم ما ناقصين تشغيلاتك انت كمان , ماشي معانا ولا؟
- اي ماشي
- خلاص أكوي لي معاك غيار
..
في تمام الساعة الخامسة :
- يلا ارحكم يا أولاد نصلي المغرب هناك
- لي يا ابوي حنمشي كداري ؟
- يا ولد كداري شنو حنركب مع عمك حمد !
- والله أحسن الكداري العربية ديك لو ضغط الانبصي بتفرمل؟
محمد : هههه
- بطلو شماتة في الناس , احسن ليكم
- حمد اتحرك ولا لسه يا ابو فهد
- لسه على ما اعتقد
- لا اله الله إلا الله حنصلي العشا هناك
الكل : محمد رسول الله
عند السابعة تماما سعمت ضوضاء واصوات غريبة خارج المنزل فتبين انه العم حمد , ركبت العائلة وتوجهت لمنزل زوج ابنتهم ..
..
- شكرا ليك يا حمد يا أخوي
عم حمد : العفو العربية دي ما جابت لي الرزق ,, بس ان شاء الله بتجيب الأجر
..
- السلام عليكم
علي يفتح الباب : وعليكم السلام اتفضل أبوي .. اتفضلي يُما اتفضلوا كيفكم
(اذان العشاء )
وبعد أن استقبلهم ..
- خالو جا خالو جا ( ابن علي و خديجة )
فهد : عبدو يا عبدو ما نسيت خالك؟ ياخ متين شرمت
-امبارح سني وقعت
- تمام امشي براحة سلم على جدك ومرة جدك
- مرة جدي دي منو يا خالو
- اسسس جيب اضانك قريب ,دي حبوبتك بس لو قلت ليها حبوبة بتحت باقي السنون الفضل ديل
- جدو جدو جدو جبت لي بسكويت
يضحك عبدالعزيز : انت جاي لجدك ولا البسكويت
- البسكويت
- البسكويت عند حبوبتك امشي شيلو
-امي امي البسكويت وينو
يضحك عبد العزيز : لخبطت ولا شنو دي ما امك
- لا لا لا دي امي برضو
- عرفتها كيف امك ؟
- كلهم بقولو ليها امي
- اها ما بتقولي انا ابوي لي
- عشان جدو انت شايب
بعد أن ضحك الجميع على هذه النكتة الطفولية تقدمت العائلة والقت السلام على خديجة وثم اقام علي الصلاة وصلى عبدالعزيز بهم العشاء , اعدت ام فهد العشاء وكان عبدالعزيز يتحدث مع زوج ابنته علي و فهد ابتعد مع اخته خديجة بعيدا عن الكل للتحدث في امر ما بينما كان محمد يلاعب عبدالعزبز الصغير ..
- سنتين يا خدوج نسيتي اهلك المساكين ديل
- لا يا أخوي ما نسيت زول بس علي وشغله بس الحمد لله تاني ما حنمشي حتة لانو استقرينا خلاص
- الحمدلله الله ريحكم
- ونعم بالله , وانت داير تستقر وتعمل بيت ياخوي متين
- والله الزمن ثم انو المسألة عاوزة مسؤلية وقروش وفلوس
مسؤلية شنو يا اخوي علي دا لمن جي طلب يدي لا كان عندو شغل ومفلس وكان زول طايش سااي , والله هسه لو شفتو تقول ببقى لمسؤلية
- ههه دا رزقو وقدره اما انا بدري علي
- لا! شنو انت عارف رزقك و قدرك ووين , ثم اتبعت بصوت حماسي : خلاص قوم انفش غبارك وشوف ليك مرة
يتحمس سعود : اختك ووين اختك وووين ؟ يا خدوووج حمستيني عديل
- هسه ما تختني في اي حتة بس لمن تعرس ختني في الكشف
ضحك سعود لكن فجآة بدأ عليه العبس
- مالك خير يا سعود ..
-هي ما نسيت القى لي مرة وووين ما كل الناس محظوظين ذي عليك دا
هههه تلج عجيب , انا عارفاك بتكشر ذي دا عشان كدا حتبدأ من هنا , ثم اخرجت صورة من اين الله اعلم
- لا اله الا الله محمد رسول الله , الا بناتك ديل آخر مرة شفت وحدة جاني طمام 3 يوم
- ياخ شوف لو عجبتك خلاص لو لا حريقة تقوم فيها و الصورة
- كدي اشوف بالنظرة الواحدة
*صيغة مبالغة اظن ان الليلة ديك عتيد ولا رقيب ما عارف بكتب لي سيئات لمن تعب ياخ انا ما رمشت زاتي ياخ عجبتني البت لمن غلط تلاتة يوم بعاين للصورة خلونا في القصة استغفرو الله.
- عجبتك يا خوة
- هـه هه ه ه
- شنو ؟ , وين البت دي ؟؟؟
- ابرد الصورة دي ادتى لي مرة صاحب علي
- علــــــــــي ياا علي
- قلنا ابرد, علي شنو انا بشوف ليك التفاصيل واي شي تعال المرة الجاية وتلقى كل شي جاهز
* انو الايمان بالحب دي مستحيلة انت عايش في السودان ياخ دولة فيها فساد في الحب ,, الحب عبارة عن بحبك وشاكوش ولا الله يغفر ... بس بيني وبين نفسي البت دي ليلى في نظري * ,, خلونا في المهم بعد زمن اتحركنا من بيت علي اللي هو زوج خديجة اقصد اتحركو اما ان بتا عشان للحصري بكرة
..
عند عودة عائلة فهد لمنزلهم تمام الساعة العاشرة مساءا دار حديث بينهم حيث يستمع جاسوس فهد (محمد)
- هسه الخلى فهد داك يبيت هناك شنو يا أم فهد
- شايفة قبيل خديجة مرقت ليه صورة ( حتى انا ما عارف شافتهم كيف )
- الله يستر
- يسترها على خير ونشوفو عريس
- امين يا رب
..
- اليوم التالي , عند شروق الشمس الساعة 7 صباحا ... (التوقيت صيفي)
صلى سعود الفجر متأخراً...
- سلام عليكم الشاي جاهز ولا أمشي يا خديجة
- جاهز يا سعود اقعد بس
- وين علي ؟-
- طلع من ستة صباحا
- مسافر ولا شنو
- هههه لا شغل بس
واثناء تناولهم الشاي ......
- اها قلتي لي اسمها منو ؟
- قدر بس ؟
خديجة خلي شغل الشفع دا بالله وريني وريحني ما تنشفتي اعصابي ؟
- اسمها مناهل
- نهض سعود قائلا : لهنا وخلاص معاك سلامة يا خوة
- على وين يا سعود .... يااا فهد تعال جاري وين
- إلى المنى يا آختاه
-تضحك خديجة وتقول : الله يعدل عليك , ثم اتبعت في نفسها : كيوووت جدا
..
- اها يا مناهل , نكوس شغل ينصلح الحال نعقد عليك دي الخوارزمية ولا بلاش
شغل شغل شغل كدي امشي لي الرمتالة ديل , احتمال منهم خير ,
..
- يا شباب
- اوو اخيرا جيت ,, فاتتك كم عشرة أنا شلت نصهم ( احد أصدقائه )
- عشرة شنوو انا دبرست من العيشة دي
- انتحار شنو يا سعود (صديق آخر )
سعود في نفسه : و دا الانا الجايهم عشان خير , ثم اتبع : استغفر الله انتحار شنو قصدي دبرست وداير اشتغل
ضحك الجميع
- في ذمتك لو لاقين شغل كان قاعدين هنا انت في السودان ياخ ( أحد أصدقاءه)
فهد بغضب : السودان دا برة من خلق الله .. ما فيه أ رزاق للناس يعني
- أبرد يا زول... و معاك حق الرزق مكتوب , بس الليلة مالك جادي كدة (مازن من أصدقاء سعود الأعزاء )
- لا والله داير أعرس بس
كلهم قالوو شنووو!!!
- أعرس بالسين ما بتفهمو يا عواليق
- اول مرة اشوفك بتكضب يا سعود ( احد اصدقائه )
- كضب شنو أنا جادي يا جماعة
- جاتك ليلة القدر ولا الآغة اتصل عليك ( صديق آخر)
- يا إلهي أنتو اصدقاء ولا حطال
- هههه الاتنين , لكن نكتتك عجييييييييييييييييييييييييبة
- حتى أنت يا مازن تف على صحبتكم ياااخ
- سعود أقيف ماشي ووين (موسى أحد اصدقاءه)
-الزول دا تاريه جادي ( احد الاصدقاء) ...
* شايفكم مليتو ياخي يلا بدل كل مرة احد الاصدقاء احد الاصدقاء خلي اوريكم معلومات عن اصدقائي بسم الله :-
عددهم أربعة وهم أصدقاء عادين أتمنيت يكون فيهم واحد يكون سوبر موني super Money
مازن .. دا فردتي الروح بالروح ... أخوي و رضعنا في زمن واحد بس الضراع ما واحد وزي ما بقولو اخو بالحيطة
فتحي .. دا زول الحفلات والخ دا صديق السوء بتاعنا وهو جار مازن بالحيطة التانية
موسى .. أطيب واحد فينا وأنا بحترمو شديد ودايما بنلعب ورق في بيتهم
حسن .. دا حسن بس
نكمل القصة :-
ذهب مازن لمساندة صديقه العزيز فهد ..
- مالك يا أخوي خير شنو موضوع العرس دا ... قاطعه فهد :
قبل ما تبدا تنصح وحنك الشياب دا هاك شوف , ثم أخرج الصورة
- أمسك !!!!!! قالها مازن متفاجئ
- مالك خير ؟
لقيتها ووين البت دي؟
- اختك خديجة
مازن في نفسه : ياخ والله النسوان ديل
- مالك ساكت يا مازن عجبتك
- ولا شي , بس ياخ والله ربنا يعينك ونشوفك عريس احتمال بعرسك ليبيا تفتح , وعن اذنك هسه بجيك
- ههههه ان شاء الله
...
- شباب شباب
فتحي : مالك يا مازن خير بتعيط ذي بتاع الخرد
- عارفين العروس منو؟
موسى : ياخ لسه ما مصدقين تقول لي العروس منو
فتحي : قول مادم هو جادي
- العروس هي الشوكشت موسى
ضحك فتحي ثم مازن و حسن الذي كان نائما استيقظ وضحك
موسى : أنت جااادي يا مازن
- أي والله هي زاتها ام جضوم
- هههه التاريخ بعيد في نفسو
..
كسرة : (الكاتب)
دقيقة بس كونك تكتب قصة من راسك مباشرة دي اصعب شي لازم تفسر اي شي تقوله وتربط الحقائق وزفت
اليكم ما حدث مع موسى قبل سنة :-
سافر فهد وعائلته إلى الريف لصوم رمضان هنالك قبل اسبوع من الشهر الفاضل وهنا تقدم موسى وعائلته بطلب الزواج من مناهل الحسناء , لكن لم يشأ الله وتم ردهم خائبيين
تكتم موسى على هذا وطلب من أصدقاءه الكتمان أيضا .. ولأنهم كلهم أولاد ذكور , لم يصل الخبر حتى إلى صديقهم العزيز فهد .
موسى : أها يا شباب ننقذ الزول دا من الشاكوش ولا نشوف الله مقدرها كيف
مازن : نتوكل بس يا زول , وذي ما قالو الصديق وقت الضيق , خلونا نمشي ونوريه الفايدة مننا
فتحي : اي معاك حق والله
- بس لازم نقسم الشغلة , واي زول حسب خبرتو
اي يا موسى , وطبعا فتحي انت عارفك شغلك شنو (صديق السوء الطلع روح البنات)ويا موسى انت عارف عن البت دي حاجات كتيرة , خليك مع سعود ثم انت الوحيد العندك شغل ..(قروش)
- هههههه , حسستوني أني أبوكم يا مازن , حاضر يا عيون بابا
نطا حسن وقال و أنا
- انت اهم زول لكن لازم تتصالح مع ابوك
- هوي لا مستحيل ,, إلا الحاج , م بقدر
مازن :قول خير عشان صاحبك سعود
- ياخ من طلق أمي شقتو عشرة عشرة
مازن : هوي دا ابوك ثم النسب ما بمشي للأم
- الرسول (ص) وصى على الام ثلاثة أكتر من الا .... - يقاطعه مازن بغضب :
خلاص يا زول اصالح مع حاجك دا وريحنا عشان نساعد الزول دا ياخ
- ابرد ياخ من دربي دا ماشي ثم زاتي جيبي اتقدا ( بقصد فلس)
ضحك الجميع
نطا فتحي قائلا : وانت شغلتك شنو يا مازن
- انا اخو العريس هههه
..
*والله م قصرو تب الله يفتح عليهم ذي ما قالوا الصديق وقت الضيق , كنت قايل المثل دا كلام جرايد سااي , انسو خلوكم مع القصة ...
في يوم جديد وصباح اشرق و ساعة عاشرة تماما في منزل فهد طرق طارق , فتح محمد الباب
- سلام عليكم
- اوووه موسى كيف أخبا...
- اسكت , اخوك في
- انت قصدك نايم ولا صاحي
- كدي ياخ زح وامشي لي ام فهد تعمل لينا عصير
- خش جاتكم العافية
..
*طبعا في اليوم دا موسى جي خلعني وصحاني من حلمة م بتتعوض , الله يجازي ياخ
موسى يوقظ فهد : سعود سعود سعود
- مالك خير خالعنا من الصباح
- صباح شنو ياخ الساعة دي بجهزو في الغداء
- تمام خليني انوم حبة يااخ قدر الصينة
يناجي موسى نفسه : الزول الكسلان دا يقومو كيف , ثم يتبع جهرا : اسمع جبت ليك حصري عن البت ديك
- يااا محمد جيب موية شراب ( كسرة : شراب ولا شُراب ههاهاها)
- لا كمل نوم عليك الله يا دب
- نوم شنو يااخ اتكلم , قبل م تنسى
- اولا البت دي ساكنة في الخرطوم في الحي الفلاني ومرطبة شديد واي زول دايرها , في مشكلة لو مرقت منها حتعرس البت دي
- شنو
- امها وابوها
- ههه يعني هو انا جاي اعرس ولا اقل ادب
- لا ما كدة ,هم ناس مقرشين مقراشين وجنهم قروش الصراحة
- امسك , دي ما مشكلة دي شبه استحالة عديل
- لا ما تخاف , اكيد جاهلين وما عارفين مصلحة بتهم وين زول يحبها ويدللها أخير من زول يمل ليها بطنها بس ( بقصد تاكل القروش يا شمال انتو ولا ... )
- تمام قول اتحلت المشكلة دي فضل شنو آآه نسيت في مشكلة تانية , انا قاعد عاطل وما عندي شي
- تنحل ان شاء الله بس بس انت قوم من السرير دا خليك نشيط ذي خلق الله
- اي يا عمك قربنا نعجز زاتو
وصل العصير وسكت الجميع , وبعد فترة انصرف موسى
في نفس المنزل :
عبد العزيز : ما شايفة الولد دا بقى نشيط كيف غريبة والله
- ما نشطتو الصورة
- يا ولية لو العرس بخلي الزول ذي دا كان عرست ليه زمان
- ما انت قلت يعرس براه عشان يتعلم المسؤلية (ولاب لاب لاه من كلام الشياب الغير مشجع بتاتا * كسرة)
- الزول لو ما استقام براه يبقى مسؤل كيف , بس تقريبا انا غلطت والله كنت اعرس ليه (كسرة تانية: في حد فاهم حاجة )
- هسه ما فات شي , قوم من دربك دا كوس ليه
- ههه لا يا أختي الكواسة دي خليها ليه انا ما عزال ( قالها بضحكة )
- انت بتقصد شنو؟؟؟
- اجري بصلتك حرقت
...
يفكر حسن : ياخ هسه مازن دا فكاها مني , اصالح مع ابوي كيف
ياخ ما هو أبوي في النهاية كدي اضرب ليه , قام بإجراء مكالمة هاتفية (كسرة : شريحتو ..... جلابي الود دا
المستقبل : الو
- الو الو وعليكم السلام
- وعليكم السلام منو معاي
- معاك حسن
- حسن منو
- حسن ولدك يا أبوي
- حسن آآآآ ههه بهظر معاك ساي كيفك يا ولدي لعلك طيب
- طيب يا يابا كيف انت إن شاء الله بخير
- كويس يا ولدي , غربية الليلة اتصلت عل ابوك
- والله داير بس اعتزر منك واغفر لي وارضى علي , ما مفترض أعمل كدا
- عافي منك يا ولدي , بس تعالني في البيت مرة وحدة ان شاء الله
تمام يا ابوي , وإن شاء ...... لم يكمل انتهى الرصيد
- ياااخ ينعل ابو شبكة ....... , اخيرا ارتاح قلبي , تسلم يا فهد
..
موسى وفتحي .. يخططان بشأن تبيدر موعد يلتقي فيه فهد و مناهل
فتحي : الظاهر الاسبوع الجاي دا حنقضيه في الخرطوم
- ليه؟- انت عارف بيت الزبون مش
- قصدك مناهل مش يا تافه , أكيد انسى نفسي وما انسى الورشة الادوني فيها شاكوش
- ههههههه نحنا حنمشي هناك نرمتل جنبهم هناك كم يوم , عندي ود عمي ساكن هناك في حي قريب منهم قريب يعني بعيد بس ما شديد , أنت جهز نفسك
- عشان شنو يعني
- والله يا موسى حنراقب اي حفلة هنالك وأتاكد من معارفي لو الزبون بحضرها عشان نضرب لي مازن يجيب سعود
- هههه كأنو فهد ابن عبد العزيز حيرقص والله سعود يمشي معاك أقصى شمال ما يمشي حفلة
- دي نخليها على مازن يلا نتحرك بس يا رب في الأيام الجاية دي يكون في حفلة في حلة الزبون دا
- يا فتحي أنا محترم ياااخ ما تقول لي زبون وما عارف مصطلحاتك الرجعية دي أتلكم بأدب يا جن
- هههه محترم قال لي , رايك شنو لو قلت ليك أنا بتكلم معاك بأدب
- هههههههه الله يهديك , يلا أرح نفسق حبة
- بس كدا أنت دا زولي زاتو..
في اليوم التالي .. زار أخو العريس العريس ليتفقد إذا تغير حاله أم لا
- أها يا سعود لقيت شغل
- يا مازن أنت لقيت
- لا
- خلاص مالك بتسأل يا جزمة
- هههه تقول شنو ! , انت ناوي تعرس البت دي ولا لاه
- أكيد
- أنت عارف إنك حاليا في مكان العروس (قصدو ما عندو اي حاجة , التحية لأخواتنا الما عندهن شي غير قبلتك زوجا لي )
- هههه أي ا والله
- أنصحك , ياخ خليها وشوف ليك وحدة تانية
- والله يا مازن البت دي ركبت لي في راسي , وهسه بسببها حاسي إني بقيت جادي شديد ,كدي أجرب حظي إحتمال يضرب
- كويس يا زول خلاص أولا إنت محتاج شغل لو لميت في شغل إعتبر إنك عرست خلاص
- والله معاك حق ,بس تفتكر نحنا عطالة ليه , السبب شنو
- هههه انسى السبب ,كل الناس عارفاهو بس عاملة نايمة ( لو البقرا كوز : بقصدكم أنتو يا كيزان يا كلاب )
..
طبعا اليوم كان مميز لأنو حسن جي خلغني خلعة تاني ذي حقة موسى هردو قلبي يااخ
- هوي شباب
- أهلين حسن , غريبة الليلة وجودك باين
يرد مازن : مالك بقيت نضيف ذي دا
- ههههه تقول شنو لقيت لي وظيفة
..
- فكني يا سعود قطعت نفسي
- نحنا هنا بنكوس لمن ضعفنا , وانت جاي تقول لقيت , يخنق فهد حسن على سبيل المزاح
بابتسام يقول مازن : فكو خلي يقول كلامو
- اااااح أول شي اتصالحت مع أبوي
- مبروك والله : مازن ثم مازن: اخيرا بقيت الموني مان بتاعنا
- هههه أي عندي ليك مفاجأة كمان يا سعود
- شنو
- نحنا مش إتخرجنا من نفس الدفعة -ومشروع التخرج كان واحد وعملنا كمجموعة
- اي ما تذكرنا ياخ قول في شنو
مازن : اي شوقتنا
- يلا مشيت لابوي قلت ليه داير اتوظف , يلا قال لي أنا نائب المدير و ما بقدر اوظفك لانو دستور الشركة بمنع انك توظف واحد من قرايبك بس لو هو عندو المؤهلات حيناقشو زول غيرك , يعني قال لي أمشي واجرب حظك مع المدير , أبوي عارف أنو اي زول في الشركة حيمشيني عشان كدا قال لي أنا حأسلمك للمدير بنفسي ( في النهاية الشركة طلع فيها واسطة , نصيحة عليكم بالواسطات يا ابنائي و استغفرالله)
- أها وبعدو
- خلاص مشيت للمدير وشاف شهاداتي وقال لي مشروع تخرجك كان شنو
- قلت لي كذا وكذا , عجبو شديد يلا سألني عملتو براك , قلت ليه لااا المشروع كان عمل جماعي , قال لي مبروك
- بس وين المفآجأة , يا حيوان إنت حكيت لينا قصة كفاحك من أجل الوظيفة , أخنقو يا فهد
- ههههه لا لا دقيقة
- في شنو ؟؟ : الاثنان معا
- قبل أمشي قال لي نادي أي زول عمل معاك المشروغ أناقشو
ماازن : جااادي
فهد في صدمة : قول والله
- بعد الخنقة الخنقتها لي دي اقدر اكضب وما تفرح لانه لوما اجتزت المعاينة حتموت حسرة
- الحمد لله الحمدلله ,تسلم يا حبيب , ثم يعانق بشدة حسن ويبدو عليه الفرح يتحرك راكضا ليزف الخبر لوالديه
..
ينظر مازن إلى حسن ويبتسم..
- أها قصتك دي حقيقة , فلم هندي تاميلي بس
- صدق يا مازن والله محظوظين عديل , القصة حقيقة والله ,ولو اتوظف حيكون إن شاء الله عن جدارة واستحقاق
- طبعا انا ما قريت معاكم لسوء حظي , اها كلمت البقية العملو معاكم المشروع
- كلمت هشام , وعمر داك اتوظف زمان
..
كلمت ناس أمي ووصلت ليهم الخبر ما صدقو وابوي فرح شديد فرحة تقول هو اللقى شغل , والله اليوم داك كان حلو شديد حسيت بإحساس جميل .. نكمل القصة كفاية مشاعر جياشة , دقيقة في جزء حأحكيه ليكم ..
بعد كم يوم كدا ذي خمسة يوم جاني مازن في البيت وقال لي ياخ معزومين حفلة , طبعا اعترضت كتير لاني ما حصل حضرت حفلة ببساطة بكره الصوت العالي والفن الرخيص الببيعو فيه دا , حاول يقنعي لكن رفضت رفض تام المهم نكمل ..
..
- ما قلت ليك يا فتحي
- حرام عليه ياخ ان شغال 4 يوم بحنك مع عواطف عشان توريني مناهل ماشة الحفلة ولا لا
يضحك موسى
- يعني هسه مافي طريقة نحضرو الحفلة دي يا موسى
طريقة وحدة .... يقاطعه فتحي :
شنو ؟؟؟؟
- خليني أكمل جملتي .. طريقة وحدة مافي
- زح مني , قبل ما اضربك
يضحك موسى ثم يصمت ليسمع ما عند فتحي :
نحنا حنمشي لو هو ما ماشي , ما حنفوت النعيم والمزز دي
- أكيد , هي بعد بكرة مش؟
..
في نفس اليوم وقت العصر عند مكان عمل حسن..
- مبروك يا سعود اخيرا اتوظفت
- الله يبارك فيك يا حسن
- خلاص كدا ضمنت الشغل
- اي نحمد الله , المدير كان طيب شديد
- بتعرف طيبتو الحقيقة لمن تنزل شغل
يضحك سعود وحسن يتحدث :
هسه من حتاتك دي ماشي وين
- حأمشي لأختي في البيت , بس وين أبوك خلينا نسلم عليه
..
- وعليكم السلام ورحمة الله اتفضل سعود , أخبارك؟ كيفك؟
- والله كويس يا علي كيف أنت أن شاء الله بخير
-الحمدلله أتفضل أتفضل حصانك جراي
..
خديجة : فرحتنا والله يا فهد ومبروك كمان
علي : مبروك الوظيفة
- الله يباركم فيكم , والله تحس إنك لقيت صندوق دهب ما شغل
يضحك الزوجان
- عبدو نايم ولا شنو
ترد خديجة : يحلق النهار كلو , تقريبا بطاريتو كملت
يضحك سعود ويتبعها: الحمدلله شبعت
- بدري يا فهد : الاثنان
- لا والله الحمدلله
-يا علي لو شبعت إلا تجيب شاي أسود لأنو خلص
- لا لا لا خلو الشاي أنا ما ضيف
- لا , لا أنا زاتي لو ما شربت الشاي راسي بصدع , ثم استأذن
..
خديجة وهي ضحك : طلعت جادي لكن , تصمت وتضحك : لو كنت عارفة كدي كان مرقت ليك الصورة زمان
- ههههه اسكتي تقولي شنو فجأة كدي رحمة من الله كل أموري أتصلحت والحمدلله
- جيب البشارة ..
- شنو قولي
- اسمع لقيت طريقة ممكن تقابل بيها مناهل !
- والله !, قوليها سريع قبل ما تنسيها
- ههههه بعد بكرة في حفلة في حيهم الدعوة عامة
كسرت خديجة صمت سعود : مالك سكت ووشك اتغير \
- ولا شي اتلبكت ألبس شنو
..
لا والله فعلا بكره الحفلات بس اعمل شنو ياخ إذا كان أكتر شي بتحبه في أكتر شي بتكره , أكيد حتقدم تضحية ذي دي بدون مقاومة ,طبعا في القصة بعد مرور يومين بس والله اليومين ديل كانو كتار في الواقع, المهم نمشي ليوم الحفلة اللي فيهو لبست أحسن غيار لي , أنا ما عندي شغل لكن عندي ملابس نسيت أوريكم أنا الزول البشدو منو أصحابه غيار للطلعة المهم الحفلة كانت بليل ذي بعد صلاة العشاء هههه لا والله قبل العشاء خلونا نكون واقعيين ...
..
سعود يناجي نفسه بين الموسيقى الصاخبة : حاجة شينة كيف ياخ تكون في الحفلة وما عارف زول ذي الأهبل
أعوذ بالله داك ما فتحي , الليلة أودي وشي وين , أحسن شي أهرب قبل ما يشوفني
طبعا وأنا منسحب بحذر تام وأثناء الانسحاب التكتيكي دا, طقشت لي زول , نعم نعم ذي ما بتفكرو , هو واحد من الشرامة البتعرفوهم ديل يا ريت لو كان واحد كانو اتنين حسن وموسى , في مصطلح شبابي عند الاولاد اسمه تعرصة او التشغيلات أفتكر عارفنه ما عارف المجتمع ظالم المصطلح دا ليه , هنا في ذي تلاتة الف كلمة من التعرصة حتبقي القصة طويلة شديد يعني لو دارين تعرفو تعرصتهم القالوها فيني ممكن احكيها لكم قصة قائمة بزاتها المهم نكمل ..
بعد فترة من الضحك والسخرية بعد أن أجتمعوا جميعا حول فهد
مازن : هههههه والله أنا بكره الحفلات
يضحك فتحي وحسن
- خلاص ما كفاية , ليكم ساعتين بتشغلوها لي
يواصلوا الضحك
- أنت عارف قالو هناية في الحفلة
- أنت جادي يا فتحي ؟؟؟
- والله و كمان عامل فيها بريء ما عارف , أنت جاي هنا عشان فلانة , طلعت روميو والله البت دي حتكفرك عديل -
- هههههه بطلو تشغلوها ليه الحفلة قربت تكمل ,وما استفدنا منها شي
- مازن أخوي أحبك
- مالك يا فهد صاري كدا
- والله يا موسى ما عارف اتواصل معاها كيف , هسه كيف يلقوها في حفلة كبيرة ذي دي
- والله ما جادي أنت معاك فتحي دا رقم أنجلينا عندو
- ههههه والله أنت أديب , أبدعت في صيغة المبالغة يا مووز
- هههه جادي جابو من صفحتها الفي الفيسبوك
- يا فتحي يا حيوان تعال قريب , عندك رقم انجي..أقصد مناهل
- والله , يا سعود ما عندي ....ما عندي رصيد بس
- ملي : فهد يخرج هاتفه
حسن : دقيقة دقيقة بس , أنت حصل حنكت مع بت
- لا
- خلاص ادي الفهم للمعلم واتعلم : حسن وهو يشير لفتحي
- دا غلط يا شباب
- كونو حبيتها دا اكبر غلط , ثم اي شي متاح في الحب والحرب
يا ود يا حكيم : موسى وفتحي
- هههه الله يقتلك يا حسن , اقنعتني
..
- توووت تووووت توووووت
حسن : افتح الاسبيكر
- الو
فتحي: آهليييين , في نفسه آآآحي من الصوت الحنين دا
-منو معاي
- معاك آسير
- عفوا
- أثير حبك
انقطع الاتصال
ينفعل فهد : زحو لي منو
موسى : ابرد يا سعود
مازن ممسكا بسعود : انت خلي المعلم يشتغل
فتحي يعاود الاتصال..
- لو سمحت تاني ما تتصل هنا
- أنا غلطت في شي ؟
- لا , بس حتغلط
- طب ممكن نتعرف قبل ما اغلط
- سخيف, تمام آنا مناهل أحمد
- أنا فهد
- ههههه , ظريف
- ههه لا جادي كمان فهد عبد العزيز
- هههه إنت عارف اسم فهد اسم حيوان اليف ذي الكلب والقط
- قولي الكلام دا في السعودية
- ههههه
ما عارف رضيت ليهم كيف يعملو كدا حسيت اني كضاب شديد , ما قدرت أعمل شي فتحي عرس لكم زول من اصحابو بالطريقة دي ما علينا المهم بعد الضحكة الفوق الما سمعتها دي الحفلة دورت كانت واقفة ذي فاصل كدا ..
مناهل : سامعة صوت موسيقى, عندكم حفلة؟ في هذه اللحظة كل من حسن وموسى يشير لفتحي : أي نحنا ذاهبون للاستمتاع
- اي , و دي نفس الحفلة الفيها انت
- والله
- ههه اي , ممكن نتقابل يا مناهل
..
المهم فتحي ومازن شجعوني وقالو لي اتقدم , حسن وموسى الحيوانات فاتو يرقصو .. وبرضو فتحي ومازن اتفككو خلوني براي , قربت ارجع البيت لانو صوت الحفلة ازعجني شديد وقرب يعمل لي صداع , المهم اتشجعت وقلت امشي ..
- هاي
- اهلين ! أنت فهد ؟؟
- الكلب! اي دا هو
- هههه معليش
- لا ولا يهمك عادي , داير أعرف الحفلة دي حفلة منو
- ههههه جادي أنت , جيت على اي اساس
- والله جيت بس اشوفك
..
طبعا من آخر جملة دي ابتدا الحنك وفجأة أتغمصت شخصية فتحي و اتنوسنا الحلفة كلها بقيت اعرف احنك باحتراف جادي والله , اتكلمنا كتير لمن عشرة ونص جات ..
- خلاص ماشة
- نعم , يا سعود ( ملاحظين قالت لي سعود ..)
- جعتي ولا شنو
- هههه تقريبا
- قبل ما تمشي داير اعتزر ليك
-لشنو ؟-
- القبيل كان بتكلم معاك بالتلفون ما انا
- ههههه بعرف , اي بت بتعرف صوت فتحي , بس بنمشيه
- ههههه مشهور تاريه
..
رجعت البيت مبسوط طبعا صليت العشاء واستغفرت تمام واتسطحت في السرير وفكرت ونمت. عشان ما اطول عليكم شايفكم مليتو مني , مفروض ما اتعمق واكشف ليكم كيف حنكت مناهل لحدي ما قبلت تزوجني , لان لو كشفت كل الحنك في شباب منكم بمشو بحكنو بيه ويغشو بنات ويكسروا قلبهن ,أنا لا أسمح بذلك شوفتوني طيب كيف المهم بعد كم شهر كدا من الشغل ومن المكالمات و الحفلات و الحاجات التانية وغيرهم جي وقت الجد .
..
جانا حسن بعربية الشركة ورفعنا انا وابوي عشان نمشي نطلب يد مناهل قبل وقت الغدا , المهم قلنا ليه يكون قريب نحنا ما حنطول بعد نخش , قبل امشي كلمت الجماعة اللي هم اصحابي وجوني في البيت واتمنو لي التوفيق وقالو لي حننتظرك هنا , طبعا مشينا بيت مناهل و واقل من ساعة طلعنا من بيتهم وجينا راجعين ..
..
يصيح محمد : العربية جااات ! ناس سعوود رجعواا
- إن شاء الله يكون خير
- اطمني يا امي
محمد يفتح الباب ..
يذهب عبد العزيز للداخل ويذهب فهد للاصدقاءه ..
نروري يا سعود - فتحي (نروري اي نصرخ فرحا ما يقابل الزغريد عند النساء)
يبتسم فهد ..يبدأو الصراخ لكن يوقفهم فهد
- ابردو ابردو يا شباب احكي ليكم الحاصل
- اي شنو قول يا عريس
- طبعا بعد الاسئلة الرسمية الشغل و غيرهم السألها ابو مناهل , وبرضو حكى لي عن غلاوة مناهل وسعادتها عندهم
- اها وافقو
موسى : خلي يكمل ي مازن
-جي دور الام , بدت تنضم وتلطم واي كلمة قالتها بدايتها شوف ونهايتها قروش , والله شفتها عشرة عشرة , المهم ضربت الحكاية في راسي طلعت حق الدية , الحارة انو ابوها قال : والله ام مناهل لو ما رضت ما احقدر اعمل شي
كمل-
- طبعا قلت عادي , الله واسع الكرم وكل يهون عشان خاطر مناهل
..
- الله الكريم يا ام فهد عسى ان تكرهوا شيئا وهو خير لكم , ناس ذي ديل ما نتشرف بنسبهم والله العظيم
خديجة بحزن : ابوي, هسه فهد كيف
- والله انا كنت ساكت ساي فهد هو القال كل كلامي
..
- اها يعني حددتو يوم للعرس يا سعود
-هههه لا يا مازن , وافقت على اي شي بس في شي ما وافقت عليه
آآآ ؟- الجميع
- عاوزين يتأكدو من قبيلتي
جادي !!-
- الحكاية دي اكلت معاي جنبة شديد علاقة قبيلتي بي مناهل شنو , جطت معاهم والله جنس جوط , واستأذنا وطلعنا
- ههههه ما جادي ما كان توريهم بس, هسه فوت حاجة قدر دا
- لو جاوبتهم يا فتحي وقبلوا انا كد حارفض نفسي وحانزل لمستواهم وبكرة بتي حيجيها زول صالح اساله سؤال حقير وعنصري ذي دا , اصلا ما يشرفنا نناسبهم والله
حسن يواسي سعود : عسى أن تكرهوا شيئاً وهو خيرا لكم
فتحي : والله أحسن من دي مافي تاني
يضحك الجميع
مازن : هههه ما علينا ارح نمشي نلعب كوشتينا في بيت عم عثمان
تحرك الاصدقاء واثناء ما هم في الطريق
..
حسن : والله يا سعود معليش
- لا , ما زعلان ولاشي
- هههه لا قصدي , غشيناك
- عملتو شنو يا كافي البلا
- هههه لمن سافرتو السنة الفاتت , موسى طلب يد مناهل برضو
- حرااام عليكم , ركبتوني ماسورة الله ياخدكم
ضحك الجميع حتى فهد
موسى : نسيتو حاجة مهمة يا سجم
كلهم قالو شنو !!!!
- ما اتغدينا ؟؟
كسرة الكاتب : طبعا النكتة الفي الحوار الاخير دي حاسي كم زول م حيفهمها , صدقة مني حاشرحها ليكم : بقصد موسى أنهم في بيت عثمان ما حيتغدو ، وصدقة تانية برضو في بداية القصة قلنا بلعبو دايما الكوشتينا في بيت ناس موسى لو ما فهمت لسه عثمان دا ابو موسى , صدقة تانية لا لا بهظر ساي نرجع للمهم هي كوتشينا ولا كتشينا ولا كوشتينا , بحاول اتماسخ عشان القصة ما تتنهي احسن ارجع لسعود قبل اتضرب
..
القصة انتهت هنا , ما عرست مناهل لانه ناس بيتها عنصرين وما ناقصين لانو العنصري ما عندو دين وبتاع مشاكل , حتى لو قدرت أعيش مع مناهل ما حأقدر أعيش معاهم , لكن اي قصة فيها نهاية سعيدة قبل ما احكيها ليكم , بعد اسبوعين او اكتر لاني نسيت مع الوجع في الاخير ضربت لي مناهل واعتذرت لي وانا بدوري اعتذرت واتمنيت ليها الافضل ..
لكن النهاية الختامية
عرست لي وحدة الله لماني فيها بعد مناهل ربنا يخليها لي مرة بألف مناهل , وهسه عندنا بت عمرها سنتين اسمها ام فهد يعني مريم ابوي اغفر لي هههه , الحمد لله عايش حياتي بقيت جلابي عديل , العرس وسع رزقي ما شاء الله اشتريت لي بيت بعد ما الاجار هداني و النصيحة حياتي اتغيرت بالكامل بعد عرست الناس ما تخاف من العرس وتعرس لو لقت فرصة ذي فرصتي دي المهم هسه انا في حفلة عرس فتحي , يلا الله معاكم ماشي ارقص ..
#
End
الكاتب / أحمد محمد حسن (جني محمد ) / الأبيض شمال كردفان
تاريخ كتابة القصة 4 اغسطس 2016
النسخة التجريبية وأول نشر تم في قروب إسكروي 30 يناير 2017 بعنوان عروس للبيع
الإصدار الرسمي وحقوق النشر مملوكة لمدونة جينمو ® 30 أغسطس 2019 عنوان عرس سعود